សិង្ហបុរី៖ បើទោះបីជាប្រទេសកំពុង និងនូវតែបន្តមានបញ្ហាពាក់ព័ន្ធនឹងការរាលដាលកូវីដ-១៩ យ៉ាងណាក្តី ការប្រកួតបាល់ទាត់ជើងឯកលីគកំពូលសិង្ហបុរី ឬ Singapore Premier League បានស្វែងរកឃើញក្រុមគ្រងតំណែងជើងឯកជាផ្លូវការ ដោយបានទៅលើក្រុមទើបរៀបចំថ្មី Lion City Sailors។ 

តាមពិតទៅ Lion City Sailors នេះគឺជាក្លិបថ្មីដែលទើបរៀបចំហេដ្ឋារចនាសម្ព័ន្ធឡើងវិញ ក្រោយពីទិញយកអាជ្ញាបណ្ណ និងសិទ្ធិគ្រប់គ្រងកាន់កាប់ពីម្ចាស់ក្លិបចាស់ Home United។ តាមពិតទៅ Home United ធ្លាប់ជាក្លិបឈ្នះជើងឯកលីគសិង្ហបុរីបាន ២លើកដែរ នៅឆ្នាំ១៩៩៩ និង ២០០៣ ប៉ុន្តែបើរាប់ឡើងវិញនេះគឺជាការឈ្នះ ពានលើកដំបូងបង្អស់របស់ Lion City Sailors ប៉ុណ្ណោះ ត្បិតក្លិបបានប្តូរម្ចាស់ថ្មី និងអ្នកគ្រប់គ្រងថ្មីទាំងស្រុង។ Sea Limited គឺជាម្ចាស់ឧបត្ថម្ភធំរបស់ក្លិប ដោយក្រុមហ៊ុននេះមានបុត្រសម្ព័ន្ធដូចជាកម្មវិធីទិញទំនិញអនឡាញ Shoppe និងក្រុមហ៊ុនប្រតិបត្តិការហិរញ្ញវត្ថុក្នុងតំបន់អាស៊ីអាគ្នេយ៍មួយចំនួនទៀត។ Lion City Sailors ធានាបានជើងឯករបស់ខ្លួនជាផ្លូវការ ក្រោយយកឈ្នះក្លិប Balestier Khalsa FC ៤-១ នាទឹកដីកីឡដ្ឋាន Jalan Besar យប់ថ្ងៃអាទិត្យម្សិលមិញនេះ។

ទន្ទឹមនឹងបរិបទកូវីដ-១៩នេះ ប្រទេសជាច្រើនក្នុងតំបន់អាស៊ីអាគ្នេយ៍បានប្រកាសលុបចោលនូវការប្រកួតបាល់ទាត់លីគកំពូលរបស់ខ្លួនដូចជាឡាវ មីយ៉ាន់ម៉ា និងវៀតណាមជាដើម ប៉ុន្តែផ្ទុយពីនេះសិង្ហបុរីនៅតែបន្តជម្នះរៀបចំការប្រកួតលីគរហូតទទួលជោគជ័យ។ ថ្មីៗនេះ សិង្ហបុរីទើបតែឈ្នះសិទ្ធិក្នុងការរៀបចំជាម្ចាស់ព្រឹត្តិការណ៍បាល់ទាត់ប្រចាំតំបន់ AFF Suzuki Cup ដែលគ្រោងធ្វើឡើងនាខែធ្នូខាងមុខនេះផងដែរ។ ដោយឡែក ងាកមកកាន់ក្លិប Lion City Sailors វិញ ក្លិបនេះនឹងត្រូវប្រកួតប្រជែងតំណាងឱ្យសិង្ហបុរីក្នុងពានរង្វាន់ AFC Champions League ឆ្នាំ២០២២ខាងមុខនេះ៕